前女子組合Freeze成員甄詠珊（Carisa），經歷兩次隆胸手術後，於兩星期前將僭建的「32D導彈」拆除，雖然「咪咪」連降兩 Cup，但她笑說：「可以挺起胸膛做人喇！」甄詠珊未入行前已接受過一次隆胸手術，07年與陳樂榣和石詠莉組成女子組合Freeze闖樂壇，大走性感跳舞路線，因當年隆胸注入的PAAG有致癌物質，她為安全起見，於07年在經理人安排下到醫院抽走PAAG，繼而重新「僭建」出32D的魔鬼身段，更打正旗號當隆胸代言人。
身體負荷不來
不過，Carisa在兩周前再次「拆彈」，由D Cup降至B Cup，昨日所見的Carisa「咪咪」大縮水，D Cup的動盪效果不復見。對於隆完又拆，Carisa說：「當年唔係為咗想大而隆胸，而係為搵食先做代言人，因為當時屋企有財政困難，代言人嘅酬勞係幫咗我解決困難。（點解又拆彈？）做嗰時都諗住一定會拆，唔會一世，因合約簽咗四年，上年先滿，因工作好忙，直到今年4月底先做到，醫生用睡眠麻醉，手術大概係一小時。」Carisa表示拆彈主要原因是她骨架太瘦，只得100磅，加上跳舞曾扭傷腰骨，隆胸令她身體負荷不來，腰骨痛上加痛。現時「無彈一身輕」的她笑說：「可以挺起胸膛做人喇！」
男友呵護備至
「咪咪」大縮水的Carisa說：「反而好多人都話我瘦咗，我都坦白話係Remove（拆胸）咗！唔係大胸唔好，係自己骨架細，應該選適合自己身形。」
談到黎明嫂樂基兒（Gaile）當年同樣隆胸後，因負荷太大而腰骨痛，最後亦告「拆彈」，Carisa稱當時還未入行，覺得Gaile很勇敢。問到拆彈一事男友可知道？她只說：「我做任何嘢佢都會支持我。」不過，Carisa在告別「32D身材」前，上月曾與圈外經商男友「長頸鹿先生」拍拖遊蘇梅島四日，全程花費由男友負責並入住豪華酒店，男友對小珊呵護備至，更炮製神秘驚喜，安排在超大浴缸玩泡泡浴，小珊冧爆說：「最難忘係佢知我想泡泡浴，返嚟見到成個浴缸都係泡，我講啲咁小嘅嘢佢都記得，我感動到喊咗好耐！」
對於Carisa和Gaile均因腰痛要「拆彈」，據家庭醫生關嘉美說：「日日裝住兩袋水出街梗係腰骨痛，天然胸嘅女子就唔會嘅。」拆彈後會否變「皺皮胸」？關醫生指年輕女士很少出現這情況，但年紀老邁則很難說。
